KALIBO, Aklan—Kabilugan nga naging maayos ag matawhay ro ikaywang dominggo it distribusyon it educational assistance it Department of Social Welfare and Development sa Western Visayas.
Suno kay Atty. May Rago-Castillo, tagapaghambae it DSWD-6 nga ginakalipay nanda ro manami nga daeagan it pila ag payout para sa mga benepisyaryo.
Ginpasaeamatan man kara ro partisipasyon ag pakikipagbueoligan it tagsa-tagsa ka mga lokal nga gobyerno.
Base sa datus, naga-abot sa 7,852 ro kabilugan nga numero it mga benepisyaryo nga nagbaton it cash aid sa bilog nga rehiyon kung siin katumbas raya it P22.7 million.
Sa nasambit nga numero, 1,692 ro halin elementarya, 1,278 sa High School, 989 sa Senior High School ag 3,893 sa kolehiyo.
Samtang, sa probinsya it Aklan, ro kabilugan nga numero it mga nakabaton hay 958 ukon katumbas it P2.3 million.
Sa nasambit nga numero, 201 ro halin sa elementarya, 172 sa High School, 152 sa Senior High School ag 433 sa kolehiyo.
Uman nga ginklaro ni Atty. Castillo nga owa sanda nagabaton it walk-in kamana man nga ro mga naka-parehistro online ag may nabaton nga text message ro andang gina-prayoridad.
