Eubos ro kalipay nga nabatyagan it sangka manugturo matapos nga sambilog imaw sa napilian para magbaton it pagpasidungog halin sa Civil Service Commission (CSC) para sa kategoryang Search for Outstanding Government Employee.
Suno kay Mr. Elnor Luna, School Principal l it Bakhaw Norte Integrated School nga mabahoe ro anang pagpasaeamat sa andang district supervisor nga nag-nominate kana para ma-qualify bilang sambilog sa Dangal ng Bayan Awardee.
Si Luna hay ro naga-isaeahanon nga nominado halin sa district of Kalibo kung siin kaibahan kara ro tatlong iba pang manugturo halin sa ibang banwa it Aklan.
Sa kabilugan, naga-abot sigon sanda sa napueo nga nakataeana nga magbaton it nasambit nga award.
Pagahiwaton ro awarding ceremony sa Setyembre 28 sa siyudad it Iloilo.
Samtang, bukas man sigon imaw sa pagpasakop sa iba pang mga kompetisyon sa paeaabuton.
