May bastante pang tyempo ro Commission on Elections para sa pag-imprinta ag delivery it mga balota nga pagagamiton para sa barangay ag Sangguniang Kabataan elections sa pihak it mga panawagan nga ipaiway ro nasambit nga eleksyon.
Raya hay matapos nga ginpundo it poll body ro pag-imprinta it mga balota nga igapadayon sa masunod nga dominggo.
Kasunod eon man raya it bag-ong development sa andang pakig-negosasyon sa National Printing Office (NPO) sa pag-imprinta it dugang security features sa mga balota it libre.
Nagsumbil man ro NPO nga ipagamit ro andang warehouse ag warehouse services para sa mga balota nga mabahoe ro igatipid para indi eon magrenta pa ro Comelec it ibang warehouse nga pagabutangan it nasambit nga election paraphernalia.
Suno pa kay Comelec spokesperson Atty. John Rex Laudiangco, nagpahaom man ro NPO it tatlong printing machines nga sarang maka-imprinta it sang milyong balota kada adlaw rason nga sarang tapuson ro pag-imprenta sa sueod it 45 adlaw kaeakip eon ro verification ag iba pang accountable forms ag may bastante mang oras para mai-deploy sa bilog nga nasyon.
Samtang, nakataeana man nga pagatigayunon ro training it mga electoral boards sa Nobiyembre para makatipid it pondo bangud eon man sa posibilidd nga pagpaiway it eleksyon.
