Pagtaas it minimum wage it mga ordinaryong empleyado sa Espanya, ginaeauman eon sa masunod nga dag-on

KALIBO, Aklan–Gina-abangan eon it mga pumueoyo sa Espanya ro implementasyon it pagpasaka it minimum wage it mga empleyado umpisa 2023.

Raya hay matapos nga aprubahan it gobyerno ro hirit nga 1,078 euros nga minimum nga sweldo it mga ordinaryong empleyado.

Ginpahayag ni Bombo International Correspondent Maria Edzel Lamparero Lopez it Madrid, Spain nga maabu nga mga tawo ro nagakalipay sa nasambit nga anunsyo bangud mabahoe raya nga bulig sa kada residente.

Mag-euwas kara, ginaeauman man sa masunod nga dag-on ro pagtao it 40 porsyento nga diskwentro para sa gas ag electric bill it mga pamilya nga naga-kita eamang it 28,000 euros panaba kada dag-on.