KALIBO, Aklan—Naka-alerto eon ro Bureau of Fire Protection ukon BFP-Kalibo kadungan sa nagahilapit nga pista minatay.
Suno kay Fire Sr. Inspector Arden Bedoña, municipal fire marshall it BFP-Kalibo nga gin-umpisahan eon it andang ahensiya ro Oplan Kaluluwa, kun sa siin nagalibot ro mga raya sa mga pampubliko ag pribadong sementeryo kamana man sa nagkaeain-eain nga lugar agud nga ipadumdum sa publiko ro pagdahan kontra sa sunog.
Ro tema sigon it andang oplan kaluluwa makaron nga dag-on hay “Gunitain ang mga Mahal sa Buhay Pero Huwag Pabayaan ang Bahay”.
Laygay pa it opisyal nga antes nga maghalin sa baeay paagto sa mga sementeryo hay i-unplug ro mga nakasaksak nga mga appliances, indi pagpabay-an ro mga nakasindi nga kandila, naka-off ro regulator it mga LPG ag iba pa agud nga masiguro nga eowas sa sunog.
Samtang, suno pa kay Sr. Inspector Bedoña nga full tank ro andang mga firetrucks, ag may mga fire officers man nga naka standby sa kada sementeryo sa Nobyembre 1 eabi eon ro andang first aid service team engkaso nga makaangkon it emergency medical case.
Mabahoe man ro andang pagpati nga uman nga magabuhos ro mga tawo matapos nga pasugtan ro face to face nga pagbisita sa mga sementeryo.
