KALIBO, Aklan–Temporaryo nga ginsaylo it Ceres bus ro andang ruta matapos ro mga serye it pagbaha ag pagkasamad it tulay sa pilang daeanon sa pilang probinsya it Western Visayas tuga it bagyong Paeng.
Suno kay Arnel Francisco, dispatcher it Ceres Bus Terminal sa Brgy. Estancia, Kalibo nga umpisa kahapon ro andang ruta hay ginhalin nanda via Jamindan, Tapaz, Janiuay ag Pototan.
Raya hay bangud nga indi gihapon maagyan ro karsada sa bahin it Mambusao, Dao ag Dumarao sa probinsya it Capiz.
Umpisa sigon ko adlaw it Huwebes hay indi eon maagyan it andang bus ro nasambit nga ruta bangud sa mataas nga tubi-baha.
Agud malikawan ro pagka-stranded it mga pasahero, ginpakamayad sigon nanda nga palibuton ro mga bus.
Owa man sigon sanda nagdugang it pamasahe apisar nga medyo nag-eayo ro andang biyahe.
Ginpahayag dugang nga magahueat pa sanda it advice kung pwede eon nga maagyan ro mga natungdan nga karsada nga nakaangkon it kasamaran ag apektado it pagbaha.
