KALIBO, Aklan—Maskin nga owa pa nasayuran ro resulta it US midterm election, apang medyu nag-umpisa eon ro 2024 elections.
Raya ro ginpahayag ni Bombo International Correspondent Greg Aguilar it California, USA.
Raya hay kasunod it naging anunsyo ni dating President Donald Trump nga uman nga magapadaeagan bilang pangueo it nasyon.
Suno kay Aguilar nga maskin nga temprano pa nga i-predict ro tsansa ni Trump, apang ro dating presidente hay presenteng ginapaburan it kaabuan nga uman nga magadaog sa Republican primary.
Nagapabilin sigon nga popular si Trump sa mga maimpluwensiyang Republican voters.
Magiging hugut kara nga kaengkwentru sa posisyon si Florida Gov. Ron DeSantis.
Samtang, owa nagapati ro kaabuan nga Republicans nga may koneksyon ro uman nga pagdaeagan ni Trump sa nagakatabu makaron nga giyera sa tunga it Russia ag Ukraine.
Raya hay kasunod it anang kontrobersiyal nga pahayag nga kon imaw ro nagdaog nga pangueo it amerika hay owa kunta natabu ro giyera bangud sa pagiging mag-amigo nanda ni Russian president Vladimir Putin.
Sa pihak nga parte, engkaso nga makaangkon sigon it rematch sa tunga ni Trump ag US president Joe Biden, mabahoe ro posibilidad nga magadaog gihapon si Biden.
Apang kon si DeSantis ro anang maka engkwentru hay medyu tagilid ro kanditura it US president.
Ginaeauman nga sa Pebrero 2023 hay magapaguwa it anunsyo si Biden kon eubusan eon nga magaretiro sa politika ukon uman nga paga-atubangon si Trump.
Nagapati si Aguilar nga kinahangean eon nga itugyan it daywang lider sa mas batang henerasyon ro posisyon bangud nga bukon eon it ideal sa andang edad ro magpungko bilang pangueo.
