Nagapangatubang sa kasong administratibo ag kriminal ro suspek nga si PSSgt. Lloyd Raymundo, sangka aktibong pulis nga naka-assign sa Caluya Municipal Police Station it Antique Police Provincial Office nga nauna eon nga boluntaryong nagsurender sa pulisya matapos nga nabaril-patay kara ro commissioner nga si Benjie Quiatchon, 24 anyos, tumandok it Valladolid, Negros Occidental ag presenteng naga-istar sa isla it Boracay.
Suno P/Capt. Rogem Batacandolo it Provincial Internal Affairs Service it Aklan Police Provincial Office ukon APPO nga nagpatigayon sanda it imbestigasyon angot sa insidente kon siin ro una eamang sa andang hurisdiksyon hay ro igapasaka nga kasong administratibo sandig sa gin-eabag nga rules and regulations sa linyada it pulisya.
Ro mga tinipon nga report hay ginpasa sa regional office kon siin ro nasambit nga police headquarters eon ro may buyot sa kaso ni Raymundo.
Nakabaehag suno kana sa memorandum nga ginpaguwa it higher office nga ginadumilian ro miyembro it kapulisan nga magsueod sa mga bar ukon mag-inom sa mga pampublikong lugar eabi eon kon bukon raya it kaibahan sa andang trabaho.
Samtang, nagapabilin gihapon nga atlarge ro sambilog pang suspek sa insidente nga si Mark Ramir Perlas, onga ni dating Aklan PPO Provincial Director Col. Ramir Perlas.
May kaangtanan kara, ginpadumdom ni P/Capt. Batacandolo ro mga kapulisan nga inde pagtuearon ro agi ni Raymundo bangud nga naghigko raya sa imahe it pulisya.
