Ginkumpirma it pamilya nga ro nasapwan nga patay sa kilid it karsada sa Brgy. Albasan, Numancia hay si Jack Mererague, 41-anyos ag residente it Brgy. Guibongan, Miag-ao, Iloilo nga halin kat nagkapandemya hay uwa eon raya naka-uli sa andang lugar ag uwa man imaw it contact sa anang pamilya.
Suno sa anang nanay nga si Haide Mererague nga nagbyahe pa halin sa probinsya it Iloilo paadto sa banwa it Numancia nga solohanon nana nga onga si Jack ag patay eon man ro anang ama.
Ginkakibot nana ro balita nga nasapwan eon lang raya nga uwa it kabuhi ag may mga igo it pagbuno sa nagkaeain-eain nga parte it eawas.
Antes pa man suno kana eomupok ro balita hay nadamguhan nana nga may nagatan-aw kana nga anino ag maeain ro anang pamatyag apang uwa imaw nagaekspektar nga mabalitaan nga patay eon ro anang pinalangga nga onga.
Panawagan ni Haide sa may kasayuran sa krimen ukon ro mga nakaibahan it anang onga nga mag-eantad sa mga otoridad agud nga mataw-an it hustisya ro hinali nga kamatayon it biktima.
Uwa sigon imaw it ideya kon paano nakaabot sa Aklan ro anang onga bangud ro eaong sigon kara sa anang asawa ag kambal nga mga onga hay magausoy it trabaho apang halin kato hay uwa eon raya nakapakita kanda.
Pursigido man ro pamilya nga igapaidaeom sa autopsy examination ro bangkay it biktima agud nga masayuran ro tul-id nga kabangdanan it anang kamatayon.
