Ginaduso sa Senado ro proposisyong laye nga tuyong mapanaba ro edad it senior citizens sa nasyon sa 56 dag-on maghalin sa presenteng 60 para magamit it mga raya it mas timprano ro andang mga benepisyo.
Paathag ni Senator Ramon Revilla nga author it Senate Bill No. 1573 nga maabo ro mga owa ginpaead nga umabot sa edad nga sisenta eabi eon tyempo makaron nga may pandemiya rason nga dapat sigon nga taw-an it haega ro mga populasyon it magueang sa pamaagi it pagpaabot it benepisyo.
Ginpakigbahin it mamalidha ro December 2022 data it DOH kung siin una sa 7.33% it covid-19 cases sa mga Pilipinong senior citizens hay nagresulta sa kamatayon kumpara sa 0.765 mortality sa mga edad 18 hasta 59 dag-on.
Paga-amyendahan man it gindihon nga Senate Bill ro Republic Act No. 7432 kung siin ginakabig nga senior citizens ro sangka Filipino resident nga tumuntong eon sa edad nga 60 dag-on.
Sa oras nga maging laye eon ra hay ro tanan nga Filipino citizens nga una eon sa edad 56 dag-on hay pagakabigon eon nga senior citizens ag entitled eon makabaton it nagakaeain-eain nga ibang benepisyo.
Sa idaeom sigon it naga-iral nga laye, ro mga senior citizens sa nasyon hay nakakabaton it 20% nga diskwento ag Vat-exemption sa mga bueong, medical supplies, pamasahe, sa mga hotel ag restuarants ag iba pa.
Entitled man ro mga senior citizens nga makaangkon it income tax exemption para sa minimum wage earners, 5% discount sa bueanan nga bill it kuryente ag tubi ag entiled nga maggamit it express lanes sa mga government ag commercial establishments.
