KALIBO, Aklan—Grabe ro naging paghilinugyaw ag kalipay nga nabatyagan it tanan nga miyembro it Vikings matapos nga magkampeon sa Tribal Big Category it kakatapos eamang nga Kalibo Sr. Sto. Niño Ati-atihan Festival 2023.
Ro nasambit nga grupo ro nag-uli it grand prize nga P1 million.
Suno kay Hark Tesorero, tribe leader it Vikings nga nagbunga ro andang pagtinguha sa paghimo it mga desinyo it andang costume nga inspired kay Sto. Niño.
Haeos ap-at nga buean suno kana ro andang naging preparasyon ag naging maugan eamang ro tanan bangud sa andang pagbueligan.
Ginpasaeamatan man kara ro mga dancers, drummers ag tanan nga mga nagbulig sa andang grupo.
Dugang pa kara nga gintao nanda ro andang best ag bilog nga debosyon sa ginhiwat nga kompetisyon.
Apang, nakabatyagn man sigon sanda it pressure bangud sanda ro nagkampeon ko 2020 Ati-atihan Festival.
Gin-aku man kara nga nalisdan sanda sa pagbakae it pilang materyales partikular sa ginagamit nga pinta.
Samtang, plano man kara nga gamiton ro andang nadag-an nga kwarta sa pagbayad it mga gingastos, magpatigayun it kasadyahan kaibahan ro tanan nga miyembro it grupo ag itago ro iba para ipondo sa masunod nga kompetisyon.
Ro buot hambaeon sigon it andang grupong Vikings hay “warriors” nga ginmana pa kara sa anang ama.
Sa pihak nga parte, nakuhit man it Black Beauty Boys ro 2nd prize; Maharlika Tribe sa 3rd prize; Tribu Linabuanon sa 4th prize; Pride of Libtong sa 5th prize; Tribu Alibangbang sa 6th prize; Pangawasan Tribe sa 7th prize ag Tribu Tiis-tiis sa 8th prize.
