KALIBO, Aklan—Gintalakay sa ginpatigayon nga committee hearing it mga natungdan nga komitiba it Sangguniang Panlalawigan it Aklan ro angot sa resolusyon it Sangguniang Bayan it Kalibo kon sa siin nakabaehag ro andang pagpamaeabag nga mabutangan it international flight ro Godofredo P. Ramos Airport sa Caticlan, Malay nga ginadumaeahan it San Miguel Corporation.
Suno kay Aklan first district board member Nemesio Neron, kapareho sa lokal nga gobyerno it Kalibo ro sentimyento it gobyerno probinsyal nga hugot man nandang ginapamaeabagan ro tikang nga ginhimo it pribadong kumpanya.
Ro Kalibo sigon ro kapital town it probinsya rason nga dapat iya gid tanan ro international flight sa Kalibo International Airport bangud nga gingastusan raya it mabahoe nga haega it kwarta agud nga mapaayos ro paeoparan nga makasunod sa standard nga klase kaparehas sa ibang international airport.
Ro Caticlan Airport suno kana hay bukon it suited nga hugpaan it international flight bangud sa matag-od nga runway nga posibleng magarisgo sa kaeowasan it mga pasahero.
Madumduman nga makapilang beses eon nga nagpaabot it reklamo ro mga negosyante sa palibot it KIA bangud sa kawad-an it kita tuga it manaba nga pasahero nga nagaagi sa nasambit nga paeoparan.
