KALIBO, Aklan—Nag-apela si Engr. Joey Ureta, maintenance head it Department of Public Works and Highways ukon DPWH-Aklan sa mga residente it Brgy. Jumarap, Banga nga maghueat-hueat anay bangud nga sigidas pa ro andang pagproseso para sa rehabilitasyon it revetment wall sa nasambit nga lugar.
Raya hay matapos nga gin-umpisahan eon ro bidding process kon sa siin daywang construction company ro nagpasakop.
Kinahang-ean sigon nga makumpleto ag ma-evaluate ro mga bidding documents kamana man ginahueat pa gid nanda ro pondo nga pagagamiton sa proyekto sa idaeom it Special Allotment Release Order ukon SARO.
Nagpangayo man raya it pasensya sa mga pumueoyo nga nagakabaeaka sa andang kahimtangan.
Ginpasiguro man kara nga sa oras nga matapos ro mga dokumentong kinahang-eanon ag kon una eon ro pondo hay gilayon nanda raya nga igaaward sa construction company agud nga maumpisahan eon ro nasambit nga proyekto.
Nasayuran nga ro nasambit nga pondo nga naga abot sa kapin sa P20-milyon pesos hay halin sa taeatapan ni Aklan 1st district congressman Carlito Marquez sa idaeum it 2023 General Appropriations Act ukon GAA.
