Ginpasiguro ni Pangueong Ferdinand Marcos Jr. nga ipadayon it anang administrasyon ro pagbulig sa mga Overseas Filipino Workers (OFWs) bilang sabat sa andang kontribusyon bilang mga ambassador it nasyon.
Raya hay personal nga nabatian ni Bombo International Correspondent Joyce Ogawa it Tokyo, Japan kasunod sa pag-atubang it presidente sa Filipino community kon sa siin ginpasiguro pa sigon it gobyerno ro suporta sa mga OFW sa pamaagi it Department of Migrant Workers.
Suno pa kay Ogawa, overwhelming ag positibo ro andang pagbaton sa presidente kaibahan ro iba pang delegasyon it gobyerno it Pilipinas bangud nga naging mas madali sigon ro pagbiyahe it mga raya sa ibang nasyon bangud sa manami nga reputasyon it mga OFW’s.
Ginpakigbahin pa sigon kanda it pangueo nga ginataw-an it igtaeopangod makaron it gobyerno ro pag-angkon it mas maabong trabaho sa nasyon.
Ginpahayag dugang nga ginpasaeamatan man sigon ni Pangueong Marcos Jr ro overseas Filipino workers (OFW) sa Japan sa andang kontribusyon sa ekonomiya it Pilipinas sa pamaagi it andang remittances.
Samtang sa pihak nga parte, ginasaligan man ni Bombo International Correspondent Imelda Hatanaka nga magaabot ro oras nga inde nanda kinahang-ean nga mag-ibang bansa bangud sa eubus nga kinahang-ean kundi sa gusto eamang nanda.
Inde sigon nana malipatan ro nasambit nga pamisaea nga ginbuhian it presidente kon sa siin tinguhaon sigon it gobyerno nga mapaumwad ro nasyon para sa mga pumueoyong Pilipino.
Eubus man ro andang kalipay bangud sa nakit-an nga kabaeaka it presidente kanda nga mga trabahante sa ibang nasyon.
