Ginhinyu ni Senate Minority Leader Koko Pimentel sa Senado nga himuon eon lang nga ‘optional’ ro planong pagbuhi uman sa Reserve Officers’ Training Corps ukon ROTC.
Ro apela ni Pimentel hay angot sa mga panawagan it pilang grupo nga eubusang ibasura ro pagbuhi uman sa ROTC bangud sa nagiging ugat sigon raya it karahasan sa mga eskwelahan kapareho it hazing.
Madumduman nga namatay sa hazing ro sangka estudyante it Adamson University nga si John Matthew Salilig matapos magpaidaeom sa welcoming rites it Tau Gamma.
Sa pihak nga i-obliga ro mga estudyante nga magpaidaeom sa military training hay himuon eon lang rayang ‘optional’ sa mga estudyante nga gustong magpasakop ukon interesadong maging militar.
Suno man kay Sen. Ronald “Bato” dela Rosa, ro panawagan para punggan ro pagbalik it ROTC sa mga eskwelahan hay sangka desperadong tikang it mga anti-ROTC nga makawaeang grupo.
Ginapareho sigon it grupong Alliance of Concerned Taechers (ACT) ro ROTC sa mga karahasan nga nagakinatabo sa mga eskwelahan kapareho it hazing nga ikinamatay ni Salilig.
Gin-insister ni Dela Rosa nga kaeayo ro koneksyon sa pagtaliwan ni Salilig sa ginaduso nga Mandatory ROTC bangud ro biktima hay namatay sa fraternity hazing ag bukon it bagud sa ROTC training.
Ginagamit eamang sigon it mga kontra sa hagna ro pagkamatay ni Salilig para handumon ag indi madayon ro proposisyong laye nga tuyong buhion it uman ro ROTC.
