Agud nga masabat ro presenteng problema nga ginapangatubang it mga vendors ag mga nagapanindahan, ginpursige it pamunuan it lokal nga gobyerno it kalibo nga makapatindog it bag-ong merkado publiko.
Suno kay Municipal Engineer Amalia Francisco nga ro proyekto hay nagabalor it P300 milyon pesos nga gin-utang halin sa Development Bank of the Philippines ukon DBP.
Naghinangae pa raya nga pinaagi sa pagpatikasog ni Mayor Juris Sucro hay basi nga madugangan pa ro nasambit nga pondo.
Nasayuran nga ko nagtaliwan nga adlaw hay ginpatigayon ro groundbreaking para sa igapatindog nga 3-storey nga tindahan.
Gindugang pa ni Engr. Franciso nga ro New Kalibo Public Market hay ginaeuman nga modern ag progresibo nga mas manami kumpara sa iba pang mga tindahan halin sa mga kilaeang siyudad.
Indi eon sigon kara maexperiensiyahan it mga vendors ag nagapanindahan ro maeasa nga lugar sa baylo hay malimyo ag nagasunod sa mga patakaran partikular ro National Codes.
Ginapatihan man nga raya hay makabalik sa kabaskog it komersiyo nga makabulig sa pag-umwad it ekonomiya it kalibo.
Ro proyekto hay pagakompletuhon sa sueod it 450 calendar days, ag target nga matapos sa Mayo 28, 2024.
