KALIBO, Aklan—Ginapatihan nga bangud sa naaywan nga nakasaksak nga gamit nga nag-overheat ag sumabog ro ginhalinan it sunog nga ginkatupok it tatlo nga baeay ag sangka bodega bandang alas-4:37 kahapon it hapon sa boundary it Brgy. Tabayon ag Pagsanjan sa banwa it Banga.
Suno kay Warren Dominguez, sambilog sa biktima it sunog nga owa it tawo sa baeay it anang igmanghud nga si Irene Dominguez nga gin-umpisahan it sunog bangud nga nag excursion ro mga raya.
Ginpahayag dugang nga ro kaeayo hay nag-umpisa sa kwarto ag posibleng madasig raya nga nagdukot sa mga eambong.
Aminado imaw nga antes ro insidente hay nakabati it eupok apang ginbalewala nana bangud nga nakita kara nga nagadap-ong ro anang ina.
Nadaehig it sunog ro mga goma nga bag-ong bakae nga nakatambak sa bodega kamana man ro mga telebisyon nga ginapa-repair.
Kaabuan sa mga biktima hay magmaeanghud nga naga istar sa sangka compound.
Owa sigon sanda it may nasalbar nga gamit bangud nga masyadong madasig ro pagkalhit it kaeayo tuga it sobra kainit nga tiempo ag mabaskog nga hangin kamana man nga himo sa mixed materials ro mga baeay.
Mag-eowas sa magmaeanghud nga Irene ag Warren, nadaeasa man ro baeay it sambilog pa nanda nga igmanghud nga si Darren Dominguez ag Jomari Rodriquez.
