KALIBO, Aklan—Uman nga nagpaguwa it executive order si Banga Mayor Noel Redison nga ginpasugtan eon ro pagbaligya ag pagpaguwa it anuman nga pork products sa barangay Sibalew sa nasambit nga banwa.
Raya hay matapos nga nag-negatibo sa African swine fever ukon ASF ro mga blood samples it mga baboy nga ginpaidaeum sa eksaminasyon.
Nasayuran nga matapos nga makaangkon it kaso it ASF sa kaiping kara nga barangay Arcanghel Sur sa banwa it Balete, random nga nagbo-oe it blood samples sa mga alagang baboy sa lugar ag tanan hay nag negatibo.
Sa pihak kara, ginklaru ni mayor Redison nga ro mga residente nga plano nga magabaligya it andang alagang baboy hay kinahangean nga magbo-oe anay it certification ukon permit sa andang barangay captain ag sa focal person it Department of Agriculture.
Mag-eowas kara, hugut sa gihapon nga ginabawae ro pagkatay sa ugsaran kundi nga required gid nga daehon sa mga slaughter house.
Sa pihak nga parte, owa pa sigon naipaguwa ro resulta it blood samples sa mga gin-test nga baboy sa barangay Sigcay rason nga indi pa makumpirma kon positibo sa virus ro pilang baboy nga nagkaeamatay idtu.
Angot kara, gin abisuhan nana ro mga hog raisers sa lugar nga likawan anay nga magbaligya it andang mga alagang baboy bilang pagdahan kontra sa ASF virus.
