Ginakabig eon sa makaron nga sangka super typhoon ro bagyo nga may international name nga Mawar.
Apisar nga owa ginaeauman nga maga-agi ro super typhoon Mawar sa Visayas hay nagapadayon sa gihapon ro ginapatigayon nga monitoring it lokal nga gobyerno it probinsya it Aklan.
Ginpahayag ni Provincial Disaster Risk Reduction and Management Council (PDRRMC) action officer Galo Ibardolasa nga sa tiempo nga makasueod si Mawar sa Philippine Area of Responsibility hay magahueag raya pa naaminhan-nakatungdan rason nga magahapit eamang raya sa ibabaw nga porsyon it Luzon.
Kun sa siin ginapahayag nga masyadong maeayo nga magaagi raya sa rehiyon it Visayas.
Apang apisar kara hay ginpasiguro ni Ibardolasa nga haom ro pamunuan it PDRRMC Aklan sa pag-abot it kauna-unahang bagyo makaron nga dag-on.
Ginpaathag pa kara nga nagapabilin sa makaron nga una sa guwa it Philippine area of responsibility ro nasambit nga bagyo ag owa pa it direktang epekto sa nasyon.
Ginaeauman nga magasueod si Mawar sa Philippine Area of Responsibility sa Byernes, Mayo 26 ukon sa Sabado, Mayo 27.
Angot kara, sa tiempo nga magsueod eon raya sa Pilipinas, pagatawgon rayang “Betty.”
Ginpasiguro man ni Ibardolasa nga apisar nga magsueod pa raya sa Pilipinas, manaba ro tyansa kara nga mag-landfall sa siin man nga bahin it nasyon.
Sa pihak nga parte, pagpadumdum ni Ibardolasa sa publiko nga pirmeng maging preparado ag ugalion ro pagpamati ag magtan-aw it mga balita para masayuran ro mga nagapangunang update may kaangtanan sa nasambit nga super typhoon.
