Uman nga nagpahayag it pagkabaeaka ro makabayan bloc sa manabang kapueungan it kongreso sa ginaduso nga hagna angot sa kontrobersiyal nga Maharlika Investment fund nga nauna eon nga ginsertipikahan nga urgent ni Pangueong Ferdinand Marcos Jr.
Sa interview it Bombo Radyo Kalibo, ginpahayag ni Congresswoman France Castro it Alliance of Concerned Teachers ukon ACT partylists nga uman nga nabutang sa peligro ro pension funds it mga trabahador halin sa Government Service Insurance System (GSIS) ag Social Security System (SSS) matapos nga uman raya nga gin-eakot sa bersyon it senado.
Ginpaathag ni Castro nga sa idaeum it Senate Bill 2020 hay uman nga ginbalik ro paggamit it pension funds it nasambit nga mga taeatapan bilang paunang pondo para sa national investment fund nga nauna eon nga ginbo-oe sa bersyon nga ginpasa it kamara bangud sa sentimiento ukon pag-oponer it publiko.
Samtang, gin-kwestiyon man ni Rep. Castro ro pag-certify kara bilang urgent ni President Marcos bangud nga owa sigon raya sa tiempo.
Ro mga ginplastar sigon nga rason it Pangueo ham-an nga kinahangean nga magtukod it maharlika fund hay normal eon nga nagakatabu kapareho sa pagtapna sa inflation, nagasinaka nga presyo it langis ag ro epekto it pagsalakay it Russia sa Ukraine kamana man ro pagtaas it interest rate.
Ginakontra man nana ro pagdugang it pondo para sa MIF, kun sa siin may probisyon nga ginapasugtan ro gobyerno nga makaangkon it access sa kapin sa P125 billion pesos nga balor it preferred shares.
Nagapati si Castro nga prone raya sa korapsyon, “money laundering” ag ill-gotten wealth bangud sa discretionary powers nga ginatau sa mga Board of Directors.
