KALIBO, Aklan—Ginklaru ni Provincial Social Welfare and Development Office ukon PSWDO head Evangeline Gallega ro nagtuhaw nga report nga ro Aklan ro may pinakamataas nga kaso it human trafficking sa bilog nga Western Visayas.
Raya hay kasunod sa ginpaguwa nga report it Department of Justice nga ro Aklan hay nakalista it 43 nga kaso it human trafficking kun sa siin ro lima kara hay sex trafficking, 13 ro labor trafficking ag 25 ro prostitusyon.
Ro nasambit nga datos hay halin pa ko 2006 hasta makaron nga dag-on.
Nagapabilin suno kana nga hugut ro kampanya it provincial government ag iba pang natungdan nga ahensiya it gobyerno agud nga matapna ro human trafficking.
Aminado man si Gallega nga ko 2016 hay eapnaag gid man sa probinsiya ro mga kaso it human trafficking kun sa siin may pilang na-intercept nga gin obra nga aeagyan it mga gustong magtrabaho abroad nga owa it nagakaigo nga papeles nga naghalin sa ibang mga probinsiya ro Kalibo international airport.
Mag-eowas kara, may pilang mga kababayin-an nga nahueog sa prostitusyon nga gindaea sa isla it Boracay nga ginpromisahan it trabaho bilang mga waitress antes ro Boracay closure.
Owa eon sigon sanda it ginpang-rescue nga mga naeakot sa human trafficking.
Madumduman nga ko Hulyo 30 hay ro observance it World Day Against Trafficking in Persons nga may tema nga “Reach every victim of trafficking, leave no one behind.”
Kadungan kara, gin-engganyo nana ro publiko nga i-report ro mga suspected human trafficking incidents sa mga otoridad, Regional Inter-Agency Council Against Trafficking ag Violence Against Women and Children.
