KALIBO, Aklan—Gin engganyo ni dating provincial board member Atty. Harry Sucgang ro mga incumbent barangay officials nga nagpungko sa pwesto umpisa ko 2018 nga indi eon magpadaeagan sa nagahilapit nga barangay ag sangguniang kabataan elections.
Suno kana nga bastante eon ro andang termino ag nagakabagay nga itau man sa iba ro kahigayunan nga makapanerbisyo.
Nasayuran nga ko 2016, na-postpone ro barangay and SK elections ko 2018.
Apang ko sumunod nga dag-on, sangka laye ro ginpirmahan ni President Rodrigo Duterte nga nagapa-isoe sa Mayo 2020 nga eleksyon sa Disyembre 2022.
Samtang, nagapati si atty sucgang nga maabu ro nagaka-interes nga magpadaeagan sa eleksyon bukon it bangud sa pagserbisyo sa publiko kundi bangud sa kwarta ag gahum.
Nakasanayan eon sigon it mga pulitiko nga kada eleksyon hay nagatipon it boto kabaylo it kwarta.
Bangud sa eapnaag nga kapigaduhon ag kawad-an it trabaho hay naging eapnaag ro vote buying sa Pilipinas.
Matsa negosyo eon suno kana ro pagkabig it mga kandidato sa eleksyon bangud nga ro kwartang ginagamit sa vote-buying hay ginakabig nanda nga kapital.
Ginpaathag dugang nga ro mga botante ro dehado sa vote-buying, bangud nga ro kandidatong nagapatigayon it makarondaya nga taktika hay siguradong maga-obra it pamaagi agud nga mabawi ro andang gingastos.
