KALIBO, Aklan—Nagpatigayon it profiling ro lokal nga gobyerno sa mga badjao nga uman nga nakit-an sa banwa it Kalibo.
Suno kay sangguniang bayan member Ketchie Luces, gin-adtunan nanda ro gintumod nga ilistaran it mga badjao sa may bahin it Oyo Torong Street kaibahan ro mga staff it Municipal Social Welfare and Development Office, Kalibo PNP, mga barangay official it Poblacion ag maging ro mga miyembro it Municipal Disaster Risk Reduction Management Office.
Tuyo nanda nga masayuran kon sa siin naghalin ro mga badjao agud nga mabuligan ro mga raya nga makabalik sa andang ginhalinan nga lugar.
Suno kana, ginsambit sigon it mga badjao nga punterya nanda ro banwa it Kalibo ag probinsya it Aklan bangud nga iya sanda nagakita pinaagi sa andang pagpakalimos agud nga mabayaran ro utang sa lugar nga andang ginhalinan.
Apang, ro iba sa mga raya hay ginarisgo ro andang kabuhi sa mga daeanon para eang makapangayo it kwarta.
Nasayuran nga pilang grupo it mga badjao ro masami nga nasisip-eatan nga nagakalhit sa banwa it Kalibo.
