KALIBO, Aklan — Nag-abot eon sa 11 nga banwa sa Aklan ro ginpaidaeum sa pink zone status halin sa red zone ukon pagiging infected.
Raya hay ginaeakipan it mga munisipyo it Madalag, Makato, Malay, Malinao, Nabas, New Washington, Balete, Banga, Altavas, Batan ag Numancia.
Sa ginpaguwa nga zoning update it National ASF Prevention and Control Program nga may petsang Pebrero 10, 2025, nagsaka eon sa 11 nga banwa ro ginpaidaeum sa pink zone samtang nagapabilin nga ro banwa it Buruanga ro na-upgrade sa yellow zone ukon surveillance zone halin sa pink zone.
Ro pink zone status hay nagasirbing buffer, kun sa siin owa it nailistang ASF apang kaiping it sangka infected zone ag mga lugar nga owa eon nakalista it ASF sa sueod it indi maganaba sa 90-diyas.
Apektado gihapon ukon sa red zone ukon infected zone ro mga banwa it Ibajay, Kalibo, Lezo, Libacao ag Tangalan.
Sa makaron hay nagapadayun ro gina obra nga tikang it DA agud nga malikawan ro pagkalhit it ASF ag masuportahan ro mga hog raisers.
Kaibahan kara ro pagpatindog it livestock inspection areas ukon checkpoints bilang pag-hugut sa biosecurity measures sa pilang lugar sa nasyon.
