KALIBO, Aklan—Medyu nakalipatan it mga law enforcers it Land Transportation Office ukon LTO nga eakot sa viral video sa pagdakop sa sangka mangunguma sa Panglao, Bohol ro ginatawag nga maximum tolerance.
Suno kay Atty. Janmar Barrios it Barrios Law Firm nga ro nasambit nga mga tawuhan it LTO hay nagsobra sa pagpatuman it laye bangud sa matsa berdugo nga pamaagi it pag-aresto sa naka-diskasan nga mangunguma sa indi pa masayuran nga rason .
Makita sa nagkalhit nga video online nga gina buytan it enforcers ro eaeaki nga naka-eubog sa ibabaw it motorsiklo ag dayun nga ginbira paubos.
Mabatian man nga ginasinggitan nana nga imaw hay sangka mangunguma rason nga may daea nga siyaw.
Ginpahayag ni Atty Barrios nga pwedeng kasuhan ro eaeaki kon may nahimo nga saea rason nga indi eon kinahangean nga maging agresibo ag anuman nga pagpanakit.
Kaibahan sigon sa maximum tolerance ro pagpaathag sa ginadakop kon ano ro andang saea nga nahimo.
Sa pihak nga parte, ro nakikita nga saea ni Atty Barrios nga nahimo it eaeaki hay ro pagdaea it deadly weapon eabi pa makaron nga may ginapatuman nga gun ban ag ro pagpakamatig-a kara nga isurender ro siyaw sa mga otoridad .
Sa makaron hay ginpahayag it Department of Transportation nga gin dismiss eon ro mga eakot nga law enforcers it LTO .
