BORACAY, Aklan—Nakalista it kabilugang 406,483 nga tourist arrival sa isla it Boracay halin ko buean it Enero hasta ko Marso 6 it presenteng dag-on.
Suno kay Kathrine Licerio, tagapaghambae it Malay Tourism Office, sa nasambit nga numero hay 107,352 kara ro foreign tourist; 290,825 ro domestic ag 8,306 ro overseas Filipinos nga mga turista.
Nagapabilin nga ginadomina it domestic ro tourist arrival sa Boracay halin sa kapin 5,300 nga arrival kada adlaw.
Sa pihak kara, positibo ro ahensya nga magadoble ro nasambit nga numero samtang nagahilapit ro summer season bangud sa gintaasan ro carrying capacity maghalin sa 6,500 paadto sa 8,500 individuals kada adlaw.
Ginpahayag dugang ni Licerio nga target nanda nga maeampasan ro 191,326 tourist arrival para sa buean it Marso ko nagtaliwan nga dag-on.
Sa makaron nga dag-on suno kana hay target nanda ro 2.3 milyon tourist arrival halin sa 2.1 milyon ko nagtaliwan dag-on rason nga puspusan ro andang effort sa pagpromote sa Boracay agud nga maabot ro goal it lokal nga gobyerno it Malay pag-abot sa tourism sector.
Samtang sa pihak nga parte, ginkumpirma ni Licerio nga bastante ro accommodation establishments sa Boracay nga magabaton it libo-libong mga turista samtang nagahilapit ro summer season kapin eon makaron nga gintaasan ro carrying capacity pasueod sa isla.
Bangud kara, ginlaygayan nana ro mga turista ag bisita nga magpa-book eamang sa accredited hotels and resorts nga makit-an ro listahan sa datos it Department of Tourism agud nga inde mabudol ag maunsyami ro masadya ag memorable kunta nanda nga bakasyon sa sikat nga isla.
Naga-eaum ro Malay Tourism Office nga magapanguna gihapon sa listahan it mga turista ro Boracay nga bakasyunan makaron nga summer season.
