KALIBO, Aklan — Ginataw-an it gahum it Department of Education ro kada eskwelahan nga resolbahon anay sa andang lebel ro mga problema nga andang ginapangatubang.
Raya ro ginpahayag ni Mar Bien Gregory Parel , division information officer it DepEd Aklan kasunod it nag-viral nga video it mga pamatan-on nga ginabugbog ro sangka babaye bilang kaparte sigon it initiation rites sa sangka lugar sa C. Laserna St. Kalibo agud nga maging miyembro it sangka grupo.
Aminado man si Parel nga hasta sa makaron hay owa pa naka-abot sa andang taeatapan ro report angot sa nasambit nga isyu.
Bangud nga ro initiation rites hay natabu sa guwa it eskwelahan, nagakinahangean sigon kara it bulig it iba pang natungdan nga ahensiya it gobyerno .
Ro isyu sa hazing suno kana hay nakasueod sa andang polisiya angot sa child protection ag anti bullying.
Sa idaeum it nasambit nga patakaran, klaru nga ginabawae ro pagpatigayon it anumang klase it kinagamo sa sueod it eskwelahan kapareho it hazing ukon iba pang initiation rites nga may kaangtanan sa fraternities, sororities ag iba pang grupo ukon organisasyon.
