Uwa gihapon it may nabaton nga kopya it dokumento ro Commission on Elections ukon Comelec-Aklan angot sa ginpasaka nga disqualification cases kontra sa siyam nga mga kandidato it aklan sa central office bangud sa nagkaeain-eain nga mga reklamo.
Suno kay Christian Itulid, election officer it Comelec-Kalibo nga puro mga “raw information” pa eamang ro naka-abot kanda. Raya hay sa pihak nga may mga media outlet nga nakabo-oe eon it kopya it disqualification petition ag ginbasa sa kahanginan. Magahueat sigon sanda it pormal nga mandu halin sa central office angot sa pagserbi it summons sa mga respondents.
Madumduman nga sa complaint sheet, gin-akusahan ro mga kandidato halin sa partidong Tibyog Akean it gina-alegar nga pageabag sa Omnibus Election Code kapareho it paggamit sa mga empleyado it gobyerno sa hilimuon nga pang-partido ag pagpanupod it gas vouchers. Nakabaehag pa sa reklamo ro ginasugid nga paggamit it mga akusado sa mga gov’t vehicles ag pagpasugot it mga nga magbuylog ro mga empleyado sa political activities nga hugut nga ginabawae it Civil Service Commission ag maeapnagon nga pagpanupod it gina-alegar nga campaign materials, gas vouchers, ag iba pang insentibo nga eabag sa election rules.
Samtang, nagapati si Atty. Itulid nga may mabahoe nga epekto sa sin-o man nga kandidato engkaso nga mapamatud-an nga guilty sa pag-eabag sa Omnibus Election Code. Pila sa mga penalidad sigon kara hay ro disqualification to hold public office kamana man ro pagka-kulong it pilang dag-on. Mabalewala man suno kana ro mga boto nga para kana ag owa it matabu nga proklamasyon kon ro kaso hay madesisyunan antes ro eleksyon, apang panibag-ong petisyon kon nadesisyunan it komisyon ro kaso pagkatapos it eleksyon ag naproklama ro akusado.
Sa pihak nga parte, pahayag pa ni Atty Itulid nga ginpasiguro sigon ni Comelec Chairman Erwin Garcia nga ro mga gindihon nga kaso sa komisyon hay pagaresolbahon antes ro adlaw it eleksyon.
