KALIBO, Aklan — Ginpadumdum it school principal it Numancia Integrated School sa mga senior citizen, Persons with Disability (PWD) ag nabdos ro may kaangtanan sa early voting hours sa adlaw it eleksyon sa Mayo 12.
Suno kay Ms. Sally Agapito, principal 1 it nasambit nga eskwelahan nga pwede nga magboto ro mga raya it mas temprano it alas-5 hasta alas-7 it agahon agud nga indi makadungan pa sa pagdagsa it mga botante.
Mag-eowas kara, makalikaw man ro nasambit nga mga vulnerable sector sa init it paniempo.
Apang ginklaru nana nga pwede gihapon sanda nga makaboto sa regular nga oras it botohan umpisa alas-7 it agahon hasta alas-7 it gabi-i.
Samtang, may una gihapon nga priority ukon express lane para sa mga raya agud nga indi eon makipila pa ag magdungan sa iba pang mga botante.
Apela man nana sa mga regular voters nga magtemprano ag indi eon paghueaton ro “last hour” agud nga makaboto it maayos ag makapahaum ro mga manugturo nga nagaserbing electoral board sa andang masunod nga obligasyon.
Sa pihak nga parte, daywang polling precincts sigon ro nakataeana sa andang eskwelahan bangud nga ro mga barangay nga owa it eskwelahan nga dating nagaboto sa NIS hay gindesisyunan nga sa andang natungdan nga lugar eon lang magboto sa andang mga barangay covered court.
Raya hay ginaeakipan it barangay Marianos, Tabangka, ag Joyao-Joyao.
