BORACAY Island — Nagpanindugan ro mga negosyante ag iba pang stakeholders nga kinahang-ean makaangkon it konsultasyon ro planong pagpatindog it tulay mgahalin sa mainland Malay patabok sa isla it Boracay.
Suno kay Nabas sangguniang bayan member Godofredo Sadiasa nga iamw man ro nagatindog nga consultant it Caticlan Boracay Transport Multi-Purpose Cooperative (CBTMPC), sandig sa laye maskin anu nga proyekto maghalin sa national government hay kinahang-ean nga may nagakaigong kasayuran ro lokal nga gobyerno nga sanda man ro magapaathag kanda nga mga stakeholders ag mga negosyante kapin eon kon maapektuhan ro andang negosyo nga ginaboe-an it pangitan-an it kaabuan it mga residente.
Engkaso suno kana nga madayon eagi ro P7.95-bilyong proposed 2.54-kilometers Boracay bridge nga pagapondohan it San Miguel Corporation (SMC) nga nauna eon nga gin-anunsyo it Department of Public Works and Highways ukon DPWH nga posibleng sa buean it Hulyo maisapinal ro desisyon hay sanda eagi ro unang maapektuhan kara.
Madueaan sigon it pangitan-an ro mga motorbanca operators ag maging ro andang mga tawuhan nga dikara nagasalig it andang ginabuhi sa andang pamilya adlaw-adlaw.
Mag-eowas kara, uwa pa sanda nakaimpas sa andang loan sa banko nga ginamit nga pondo nga mabayluhan ro andang mga motorbanca it fiber glass halin sa tradisyunal nga kahoy nga nauna eon man nga ginmando kanda it Maritime Industry Authority ukon MARINA.
Rason nga panawagan nanda sa mga natungdan nga ahensya it gobyerno nga tun-an it mayad ro proposed project ag pamatian man ro andang apela ag hinaing para sa kamaeayran it tanan.
