KALIBO, Aklan — Haom eon ro Aklan Police Provincial Office sa andang magiging deployment it PNP personnel sa pagsikyar it kaeowasan it mga beach goers sa maabot nga selebrasyon it kapyestahan ni San Juan de Bautista sa Hunyo 24.
Suno kay P/Capt. Aubrey Ayon, tagapaghambae it Aklan PPO, raya hay dag-unan eon nga aktibidad rason nga nagapabilin sanda nga nakaalerto ag maging ro andang mga pagpahaom kasunod eon man sa pagbukas it klase makaron nga adlaw it Lunes sa mga pampublikong eskwelahan.
Suno pa kana, makit-an ro police visibility sa mga coastal areas kon sa siin magabutang sanda it police assistance desk kabulig ro Philippine Coast Guard ukon PCG, Municipal Disaster Risk Reduction Management Office ukon MDRMMO’s, Bureau of Fire Protection ukon BFP ag iba pang force multipliers.
Mag-eowas sa pagbutang it police assistance desk, may police mobile patrol nga magalibot sa mga lugar nga pagadagsaon it mga tawo sa nasambit nga adlaw agud nga iselebrar ro kapyestahan ni Sr. San Juan de Bautista.
