KALIBO, Aklan — Dead on arrival sa Aklan provincial hospital ro sangka padre de pamilya kadungan sa selebrasyon it fathers day matapos nga ginbaril-patay it uwa pa makilaeang suspek, bandang alas-6:00 dominggo it gabie nga natabo sa Brgy. Lapnag, Banga.
Ginkilaea ro biktima nga si Remy Asiong, 45-anyos ag tumandok it banwa it Libacao apang presente makaron nga naga-istar sa nasambit nga lugar.
Sa pagpangusisa it Banga Municipal Police Station, kapin sa ap-at nga adlaw paeang kat naghalin sa nasambit nga barangay ro pamilya Asiong halin sa banwa it Libacao.
Bago pa man sigon ro insidente hay nataeopangdan eon it pamilya nga may naga-aligid-aligid nga mga tawo sa andang panimaeay apang uwa sanda nakasayod kon anu ro rason it pagpatay sa andang padre de pamilya.
Kapin sa ap-at nga eopok it baril ro nabatian bago nakit-an nga duguan si Asiong nga nakasueod pa sa andang baeay matapos nga gin-atubang ro tawo nga nag-usoy kana ag raya man ro ginaturo nga suspek sa krimen.
Gilayon nga nakaresponde ro Banga PNP personnel ag nadaea pa sa ospital ro biktima apang gindeklara it attending physician nga dead on arrival.
Ro insidente hay padayon pang ginaimbestigahan it pulisya agud nga matumod ro suspek ag motibo sa krimen.
