Ginpahayag it Department of Education (DepEd) ro mga tikang para solusyunan ro kakueangan it classrooms sa nasyon, kadungan it pag-umpisa it School Year 2025-2026.
Suno kay DepEd Assistant Secretary for Strategic Management Roger Masapol, ro classroom deficit hay sambato sa mga nagapangunang hangkat it andang taeatapan, nga presenteng naga-abot sa 165,000.
Bangud sa limitadong pondo, 1,500 classrooms eamang ro napapatindog kada dag-on.
Bilang solusyon, gin-taas ro alokasyon it voucher programs para sa mga pribadong eskwelahan para madugangan ro andang kapasidad sa pag-baton it mga estudyante, nga naga-pahaeuga man sa public schools.
Ginpili man ro mga inunga nga independent learners para sa distance ukon virtual learning para maibsan ro dueut-dutan sa mga public school classrooms.
Sa pihak nga nagapangunang ipatuman ro face-to-face classes, padayunon man ro blended learning sa pilang mga lugar.
Dugang kara, gin-anunsyo ni DepEd Secretary Sonny Angara ro paggamit it Public-Private Partnerships (PPP) para sa pagpatindog it mga classrooms.
Sa idaeom it programa ngara, ro pribadong sektor ro magapatindog it classrooms nga pagabayaran it gobyerno sa sueod it pilang dag-on.
Ginatunguhaan man it DepEd nga solusyunan ro hangkat ngara para masigurong maayos ro kahimtangan it mga estudyante.
