Agud nga masiguro ro alertness it pulisya ag kon nagasunod ro mga raya sa ginapatuman nga 5 minute response policy, nagpatigayon it random call ro sangka national TV station kon sa siin live nga ginainterview si Philippine National Police (PNP) chief P/Gen. Nicola Torre III.
Sambilog sa nasampolan hay ro Aklan Police Provincial Office Tactical Operation Center kon sa siin nagtao it manami nga impression sa PNP chief nga gilayon nga nasabat ni PCapt. Aubrey Ayon, tagapaghambae it Aklan PPO ro nasambit nga random call.
Suno kay PSSgt. Leonilyn Artes, sambilog man sa tagapaghambae it Aklan PPO, uwa sanda it idea sa random call kon sa siin una gale mismo ro PNP chief sa oras it pagtawag it national TV.
Ro Aklan PPO suno kana hay nagatuman ag nagasunod sa mandato ag ginahimo ro andang trabaho it eksakto rason nga nagtao raya it manami nga impression sa hanay it pulisya bangud nga mismong ro PNP chief ro nakasaksi it alertness it Aklan PPO.
Nasayuran nga ginpatuman ro 5 minute response policy pagpungko ni P/Gen. Torre kon sa siin suno kana inde pag-usuyon sa presinto ro mga kapulisan bangud nga una mismo sanda sa telepono ag madasig nga makaresponde sa sueod it limang minuto sa oras nga kinahang-ean ro andang serbisyo eabi eon sa mga naga-eontad nga krimen.
