KALIBO, Aklan—Ginpanindugan it grupong Bayan Panay nga bukon it sabat ag solusyon ro pagtaas it pamasahe sa nagahana nga pagtaas it mga produktong petrolyo daea it nagapadayon nga tensyon sa tunga it Israel ag Iran.
Suno kay Elmer Forro it Bayan Panay ag imaw man ro lead convenor it No to PUV phaseout nga ro panindugan nanda kaibahan ro Pagkakaisa ng mga Samahan ng Tsuper at Operator Nationwide ukon PISTON sa bilog nga Panay Island nga bukon it makatarungan ro dugang nga pamasahe bangud nga dugang paeas-anon eamang raya sa mga commuter eabi eon makaron nga bukas eon ro klase para sa school year 2025-2026.
Suno pa kana, maskin nga uwa pa ro nagalala nga gyera sa tunga it nasambit nga mga nasyon hay sigidas eon man ro pagtinaas it nasambit nga mga produkto.
Ro gyera sa tunga it nasambit nga mga nasyon hay ginagamit eamang it mga maeagkuan ag gahaman nga mga kumpanya it langis para mapaumwad pa gid ro andang negosyo ag makabenipisyo sanda it husto maskin nga nagaaray eon ro mga ultimo nga tawo bangud sa ginaeauman eon man nga pagtaas it mga nagapangunang baeak-eon.
Sa kamatuoran suno kana, may bastante nga reserba ag suplay it langis para sa nasyon rason nga inde eon kinahang-ean ro dugang nga pamasahe bangud sa posibleng inde man magbuhay ro pagtaas it langis ag magabalik man raya sa manaba nga presyo kaparehas it nakaangdan.
Apang, kon ro pamasahe eon ro magtaas maskin magnaba pa ro presyo it produktong petrolyo hay inde eon magbalik sa nakaangdan nga presyo ro pamasahe it mga commuters.
