MALINAO, Aklan—Gahimas eon makaron it maeamig nga rehas sa locked-up cell it Malinao Municipal Police Station ag posibleng magapangatubang sa kasong Murder ro 18-anyos nga eaeaki matapos nga naimbolbar sa insidente it pagpamuno nga nagresulta sa hinali nga kamatayon it anang kasimaryo sa Sitio Mambog, Brgy. Cabuyan sa banwa it Malinao, Sabado it hapon.
Ginkilaea ni P/Lt. Alnie Fontenilla , Deputy Chief of Police it Malinao PNP Station ro suspek nga si June Rey Isuga ag residente it nasambit nga lugar.
Samtang, dead on arrival mat-a sa Aklan provincial hospital matapos nga makaangkon it makapilang beses nga pagbuno sa nagkaeain-eain nga parte it anang eawas ro biktima nga senior citizen nga ginkilaeang si Antonio Igham, 71-anyos, ag residente man it nasambit nga barangay.
Sa imbestigasyon it pulisya, ginpahayag ni P/Lt. Fontenilla nga una sa idaeom it impluwensya it aeak ro suspek kat matabo ro insidente kon sa siin nagtueod sigon sa anang kaakig ro nagakaduea nanda nga manok ag ro biktima ro anang ginapasibangdan.
Apang, mabuhay eon sigon raya nga natabo ag uwa manlang nana ginreport sa puliya ukon maging sa andang barangay council.
Si Isuga hay nakataeana nga pasakaan it kaso sa piskalya agud nga maproseso ro pag-inquest kana bangud sa pagbuno-patay sa anang kasimaryo.
