Ap-at ro namatay samtang 12 nga iba pa ro naninahan matapos nga anuron sa spillway ro sangka rescue vehicle sa La Libertad, Zamboanga del Norte.
Base sa report, gingamit ro sangka excavator para haw-ason ro rescue vehicle nga nahueog sa Dapitan River sa Barangay El Paraiso, adlaw it Lunes, Hunyo 23.
Kaibahan sa mga namatay ro 37-anyos nga barangay captain sa Dumingag, 11-anyos kara nga unga ag daywa pang babaye nga igbata.
Samtang, gindaea sa ospital ro 12 nga iba pang naninahan nga indibidwal agud nga boengon.
Tanan nga mga biktima hay mga miyembro it sangka religious group.
Sa imbestigasyon it kapulisan, pauli eon kunta ro mga biktima halin sa sangka fellowship activity sa Calamba, Misamis Occidental.
Nag-usoy it shortcut ro driver antes ro nasambit nga aksidente.
Ginpahayag nga posibleng ginsugae it driver nga mag-agi sa lugar, apang bangud sa mabaskog nga sueog it tubi rason nga inanud ro andang saeakyan.
Gindaea sa Dumingag ro tanan nga mga namatay ag nakaeowas.
Ginklaru man it Dumingag local government unit nga ginpasugtan kara ro mga biktima nga gamiton ro rescue vehicle.
Ginasugid nga may request letter ro kapitan agud nga magamit nanda ro saeakyan sa pagtambong sa two-days fellowship sa Calamba.
