KALIBO, Aklan — Angay ag bagay eamang nga nagresign sa pwesto sanday Executive Secretary Lucas Bersamin ag Budget Secret Amenah Pangandaman matapos ro alegasyon ni Zaldy Co nga may kahilabtanan sanda sa budget insertion ag flood control scandal.
Suno kay Atty. Harry Sucgang, political analyst sa Aklan nga ro pagbaton ni President Ferdinand Marcos Jr., sa andang resignasyon hay sangka tikang agud nga malimpyuhan ro anang pangginobyerno ag maibalik ro pagsalig it publiko ag international community.
Indi sigon pwedeng balewalaon ro rebelasyon ni Co bangud nga raya hay dating chairman it gamhanan nga House Committee on Appropriations rason nga imaw ro nakasayod kon sin-o ro mga nagsingit sa national budget.
Dugang pa nga indi man imaw maghambae kon owa it ebidensiya ukon resibo kumbaga.
Nagapati si Atty. Sucgang nga nagiging madahan ro pangueo sa anang mga desisyon bangud sa pagkabaeaka nga matuead ro anang kapalaran sa natabu sa anang amang si dating Pangueong Ferdinand Marcos Sr., nga napatalsik sa pwesto bangud man sa isyu it korapsyon.
