KALIBO, Aklan — Gin-anunsyo it Kalibo Municipal Police Station nga case closed eon ro natabu nga bomb threat sa sangka pribadong eskwelahan, adlaw it Huwebes, Disyembre 4 it makaron nga dag-on.
Suno kay P/Lt. Sally Bretania, Deputy Chief of Police it Kalibo MPS nga sa ginpatigayon nga follow-up operation it mga pulis, natigayon nga ma-trace nanda ro nagapanag-iya it account nga gingamit sa pagpadaea it bomb threat sa Facebook account it sangka Grade 9 student.
Nadiskubrehan ko ulihi nga ro nasambit nga 14-anyos nga estudyante nga nagsugid nga nakabaton it bomb threat ro mismong may kahimuan.
Gamit ro anang sambilog nga account hay nagpadaea imaw it mensahe sa anang main account.
Madumduman nga bandang alas-9:00 it agahon it Huwebes, ginasugid nga nakabaton ro 14-anyos nga estudyante it Saint Dominic School it pagpamaeag pinaagi sa mensahe halin sa Facebook user nga nakilaea bilang si “Abdul Louise” nga may gintanum nga bomba sa ground floor kamana man sa third ag fourth floor it eskwelahan.
Rumesponde ro Explosive Ordnance Division (EOD) it Aklan Police Provincial Office sa eskwelahan ag haeos sang oras ag tunga nga nag-search ro bomb squad.
Ro insidente hay nagtuga it panic sa mga ginikanan rason nga ginsueang ro andang mga unga.
Apang owa it nakitang bomba ag hoax eang sigon ro nasambit nga threat.
Gin-insister sigon it estudyante nga na-curious eamang imaw sa sunud-sunod nga natabu nga bomb threat sa mga eskwelahan ko nagtaliwan nga mga domingo sa siyudad it Iloilo ag iba pang lugar.
Ginpaidaeum sa counselling ro unga it natungdan nga ahensiya it gobyerno. Sa pihak nga parte, nakadepende eon sigon sa eskwelahan kon magapasaka it kasong sibil sa ginikanan ag kon ano ro andang disposisyon sa nasambit nga estudyante sandig sa andang polisiya.
Laygay ni P/Lt. Bretania taw-an it nagakaigo nga pag-giya ro mga inunga.
Dugang pa nga indi paghinangae angot sa bomba bangud pwedeng maaresto ag makasuhan sa pag-eabag sa P.D. 1727 ukon anti bomb joke law in relation to Section 6 it R.A. 10175 sa Anti-Cybercrime Law nga may penalidad nga kapin sa P40,000 ukon pagkakulong it hasta sa limang dag-on.
Plano man nanda nga magpatigayon it mga lectures sa mga eskwelahan angot sa peligro it bomb threat.
