KALIBO, Aklan — Matapos ro ginpatigayon nga ocular inspection it composite team it lokal nga gobyerno it Kalibo sa pagpanguna ni Kalibo Mayor Juris Sucro, ginkumpirma it barangay council it Bakhaw Sur Kalibo nga may una eon nga rekomendasyon agud nga masolusyunan ro ginareklamo nga masangsang nga hugum nga nagahalin sa open dumpsite ukon tambakan it basura.
Suno kay Punong Barangay Bernabe Aquino it Bakhaw Sur Kalibo nga matapos ro andang ginpatigayon nga inspeksyon hay natalakay ro anang suhestiyon nga tambakan anay it eapok ukon baeas ro ibabaw nga portion it mga basura agud nga mapahagan-hagan ro hugum nga nakaka apekto eon sa mga residente.
Kaibahan sa ocular inspection ro Solid Waste Management Unit, MEEDO, engineering department, Municipal Planning and Development Office ag iba pa.
Ginpromisa sigon ni Mayor Sucro nga paga-aksyunan ro nasambit nga rekomendasyon sa mas madali nga tiempo apang owa man it gintaeana nga timetable.
Madumduman nga nagbaeay it resolusyon ro konseho ag ginsumite sa Sangguniang Bayan angot sa nasambit nga problema bangud sa hatud kara nga peligro sa ikamayad nga eawas it mga apektadong residente kamana man nga halit sa palibot bangud nga maeapit raya sa Aklan river ag sa mga tanum nga bakhawan .
Kaeabanan sigon nga naga-grabe ro hugum kada tiempo it amihan ag tig-ueuean.
Nasayuran nga ro 3.8 nga ektaryang open dumpsite hay nahamtang sa katung-anan it Old Buswang ag Bakhaw Sur.
Samtang, owa sigon imaw nakasayod kon may tikang man nga ginhimo ro konseho it Brgy. Old Buswang angot sa isyu .
