Gin-eauman eon it pilang kritiko ni Pangueong Ferdinand Marcos Jr. nga inde maipasaka sa ibabaw ro reklamong impeachment nga gindihon kontra kana.
Raya hay matapos nga daeayong ginpatay it House Justice Panel ro reklamo matapos matumod nga raya hay insufficient in substance.
Suno kay Leodegario De Guzman, National President it Partido Lakas ng Masa (PLM), uwa it imposible ro tanan kon kaalyado ro mga nagapungko ag nagatalakay it reklamo.
Kaparehas suno kana sa administrasyon ni dating Pangueong Rodrigo Duterte nga haeos tanan nana nga ginahimo hay tama bangud sa imaw gihapon ro masunod.
Ro daeayon nga pagbasura sa reklamong impeachment hay gin-eauman eon sigon maskin nga bukon raya it dead on the spot bangud nga nag-agi pa sa Kamara de Representantes ag idto nakaangkon it deliberasyon ag botohan.
Dugang pa ni De Guzman, majority sa Kamara hay kaalyado ni Pangueong Marcos Jr. rason nga madali eamang ro pagbasura sa nasambit nga reklamo.
Madumduman nga nagpaabot it anang kalipay ag gindayaw it Presidente ro Kamara de Representantes sa maayos nga pagtuman it andang obligasyon.
Nauna eon nga ginhambae nana nga uwa imaw nagkabaeaka sa mga reklamong ginpasaka kontra kana bangud sa uwa sigon it klaro ag bastanteng basehan para imaw hay patalsikon sa pwesto.
