NUMANCIA, Aklan—Nakumpiska it mga awtoridad ro mga baril ag bala sa ginpatigayon nga pag-serbi it search warrant sa baeay it sangka tanod sa Barangay Tabangka, Numancia, agahon it Biyernes, Pebrero 20, 2026.
Ro operasyon hay pinaagi sa pagbueuligan it gintingub nga pwersa it Provincial Intelligence Unit it Aklan Police Provincial Office ukon APPO, kaibahan ro Numancia Municipal Police Station ag 1st Aklan Mobile Force Company agud nga mapatigayon ro nasambit nga operasyon.
Target it mga awtoridad ro baeay ni alyas “Julimar”, 43-anyos, tanod sa Brgy. Bugasongan, Lezo ag residente it nasambit nga lugar base sa mga impormasyon nga nakabaehag sa ginpaguwa nga search warrant it korte.
Sa maid-id nga paghaeughog it mga kapulisan sa baeay it suspek, narekober ro tatlong nagkaeain-eain nga klase it armas ag bala kaibahan kara ro sangka rifle, sangka kalibre .22, ag mga bala kamana man ro sangka kalibre .38 nga kargado it mga bala.
Apang gin-insister it suspek nga ro narekober nga kalibre .38 nga baril nga nakita sa sueod it bueutangan it mga eambong hay owa nana ginapanag-iyahan ag nagpanindugan nga raya hay “planted.”
Samtang, ro tanan nga mga armas ag bala nga nakumpiska halin sa suspek hay presenteng sa kustodiya it Numancia MPS para sa tamang disposisyon.
Ginkasa ro operasyon matapos nga makabaton it reklamo ro mga awtoridad nga raya hay nagapinaeupok it baril sa andang lugar.
Kabaliskaran raya sa pahayag it barangay council it Tabangka nga owa it anuman nga record ro suspek sa andang lugar.
Samtang, gin-insister it kapulisan nga ro nasambit nga kadaeag-an hay nagapakita it andang determinasyon nga suk-ean ro ilegal nga pagtago ag pagpanag-iya it armas nga owa it nagakaigo nga dokumento.
