Nagapahaum eon ro Office of the Provincial Agriculturist sa posibleng epekto it tag-init sa ani it nagkaeain-eain nga produktong agrikultura sa probinsya.
Suno kay Engr. Alexys Apolonio it OPA-Aklan nga target nanda nga makipag-angot sa National Irrigation Administration ukon NIA-Aklan para sa pag-usisa sa kahimtangan it mga irigasyon sa eastern ag western side it probinsiya.
Tuyo kara nga maka-usoy it iba pang source it tubi agud nga mabawasan ro maeain nga epekto it tag-init sa tanum nga paeay.
May ibang kanae sigon it irigasyon sa western side ro nasamad nga kinahangean nga ma-repair.
Bangud nga magka-iba ro planting season, kapin pa sa 40% it mga tanum nga paeay hay una pa eamang sa vegetative stage nga nagakinahangean it tubi samtang ro iba hay nakataeana eon nga iga-harvest.
Posible man, suno sa opisyal, nga magnaba ro water level sa Aklan river ag iba pang ginaboe-an it patubi.
Bilang sabat, ginpasiguro it OPA nga magatau sanda it nagakaigo nga bulig sa mga mangunguma kaibahan ro pagpanupod it mga binhi, pesticide, abono, water pumps ag iba pa nga naka-program eon ag nakataeanang igapanupod.
Magapatigayon man sigon sanda it maid-id nga pagbantay ukon monitoring sa mga kaeanasan nga maapektuhan it grabeng tag-init.
