Baeantayan hin-aga it agahon kon anu ro masunod nga tikang nga pagahimuon ni US President Donald Trump matapos nga gintaw-an it 48-hour ultimatum ro Iran para buksan ro Strait of Hormuz.
Sa interview it Bombo Radyo kay former Magdalo partylist representative Gary Alejano, bilang dating soldado hay nagapati imaw nga pagatumanon ni Trump ro anang pagpamaeag nga pagapulbuson it Amerika ro mga planta it kuryente it Iran sa oras nga inde pagbuksan ro Strait of Hormuz nga aeagyan it mga cargo it langis.
Ginpaathag dugang ni Alejano nga pride ni Trump ro nakataya rason nga kon inde magsunod ro Iran hay may posibilidad nga waskon it military it Amerika ro mga power grid kara nga eubusang makaapekto ag makahalit sa nasyon.
Madumduman nga ro nasambit nga tensyon hay nag-ugat sa de facto blockade it Iran sa nasambit nga kipot nga ginaagyan it 20 porsyento it langis sa bilog nga kalibutan rason para humampak ro presyo kara sa masobra $100 kada bariles.
Apang, bilang baeos, nagpaandam ro militar it Iran nga punteryahon man nanda ro mga energy ag desalination infrastructure it Amerika sa rehiyon kon ipadayon ni Trump ro anang paeag.
