Ginpahayag ni Interior Secretary Jonvic Remulla, nga posibleng mag-abot it sang domingo hasta tatlong domingo antes nga maibalik sa Pilipinas si dating Ako Bicol-Party List Rep. Elizaldy “Zaldy” Co halin sa nasyon Czech Republic.
Si Co hay naaresto sa Prague matapos sigon nga madakpan nga owa it tamang travel documents samtang ginahana nga magtabok paagto sa Germany.
Base sa report, ginpabalik imaw it Czech authorities ag presenteng gina-ayos ro proseso it anang deportation.
Ginpahayag pa ni Remulla nga nakadepende ro kadasig it anang pag-uli sa koordinasyon it Department of Foreign Affairs ag mga awtoridad sa Czech Republic. May mga komplikasyon man sigon bangud nga kanselado eon ro anang Philippine passport.
Suno sa mga opisyal, naka-agto eon man si Co sa nagkaeain-eain nga nasyon sa Europa antes imaw nga maaresto, ag posibleng mag-agi pa imaw it France bago maka-abot sa Czech Republic.
Si Co hay nagapangatubang sa mga kasong graft ag malversation angot sa gina-alegar nga iregularidad sa P289.5 million flood control project sa Oriental Mindoro. Ginakabig eon man imaw nga “fugitive from justice” it Sandiganbayan matapos sigon nga nagpamalibad nga magbalik sa Pilipinas para mag-atubang sa mga kaso.
Sa oras nga maka-uli eon imaw, pagadaehon imaw sa Sandiganbayan para sa arraignment ag posibleng ikulong sa Camp Crame samtang ginapamatian ro anang kaso.
Samtang, ginpahayag it Malacañang nga haum si Pangueong Ferdinand Marcos Jr. sa anumang magiging pahayag ni Co ag nagpanindugan nga dapat magapanabat ro mga eakot sa flood control corruption scandal.
