Ginlunsar eon it Department of Education (DepEd) ro nationwide Oplan Balik Eskwela bilang pagpahaum sa pagbukas it School Year 2026-2027 sa Hunyo 8, 2026.
Suno kay Education Secretary Sonny Angara, pagahiwaton ro Oplan Balik Eskwela umpisa sa Hunyo 1 hasta Hunyo 11 agud nga masiguro ro maayos nga pagbukas it klase sa bilog nga nasyon.
Tuyo it programa nga mapadasig ro enrollment process, masabat ro mga concern it publiko, ag masiguro nga haum ro mga eskwelahan para sa panibag-ong school year.
Kapin sa 16 nga ahensya it gobyerno ag utility partners ro magapasakop sa preparasyon para sa pagbukas it klase.
Kaibahan kara ro Department of the Interior and Local Government (DILG), Philippine National Police (PNP), Department of Health (DOH), ag iba pa nga magadumaea sa pagpatuman it safety, health, ag traffic management measures sa mga eskwelahan.
Pagatutukan man it Department of Transportation (DOTr) ro daeagan it mga commuter sa pag-umpisa it klase samtang ro Department of Information and Communications Technology (DICT) ag National Telecommunications Commission (NTC) hay magabulig sa pagpabaskog it communication ag connectivity services.
Nakabantay man ro National Disaster Risk Reduction and Management Council (NDRRMC) para sa mga posibleng epekto it maeain nga paniempo ag iba pang emergency situations sa tiempo it school opening.
Pagasiguraduhon man nga makaangkon it bastante nga supply it kuryente ag tubi sa mga eskwelahan.
Agud nga mas pa nga mapadali ro pagsabat sa mga concern it mga ginikanan ag estudyante, maga-operate man ro Oplan Balik Eskwela Public Assistance Command Center pinaagi sa hotlines, text messaging, email, ag social media platforms halin sa central, regional, division, hasta sa school levels.
Gin engganyo man it DepEd ro publiko nga makipagbueuligan agud nga maging maayos ag eowas ro pagbukas it klase makaron nga dag-on .
