Nagpangayo it pasaylo sa anang social media si dating Mister Supranational Philippines 2024 Brandon Espiritu matapos ro anang kontrobersyal nga komento angot sa mga beauty pageant contestant nga may halong dumuueong ukon ginatawag nana nga “halfies.”
Nag-ugat ro isyu sa sangka viral nga baeayluhan it komento sa Instagram sa tunga ni Espiritu ag Filipino-American model ag pageant titleholder nga si Jether Palomo. Sa nasambit nga mga conversation, ginpahayag ni Espiritu nga mabudlayan nga makipagsabayan ro Pilipinas sa national pageant kun owa ro mga Pilipinong may dugong foreigner.
Si Palomo, nga pirmeng naga-represent sa Pilipinas sa mga male pageant, hay ginkoronahang Mister Pilipinas Global 2025 ag naging representante it nasyon sa Mister Global 2025, kun sa siin, nagtapos imaw sa Top 11. Bago kara, nakilaea man imaw bilang grand winner it sangka canned tuna brand ag first runner-up sa Mister Tourism World 2023 nga ginpatigayon sa Brazil.
Nag-grabe ro kontrobersiya matapos magkomento si Palomo it linyang “I pledge allegiance to the flag,” nga nagatumod sa bandera it Estados Unidos, angot sa sangka pageant segment kun sa siin ginpakanta ro mga contestant gamit ro andang kaugalingon nga lenggwahe. Nagsabat si Espiritu it “Raise that flag brother.”
Sangka netizen ro nagpangutana kun ham-an nga owa it nagkanta sa Tagalog maskin nga may mga contestant nga naga-represent sa Pilipinas. Dikara hay ginhambae ni Espiritu nga owa man sanda naga-istar sa Pilipinas. Kat hambaeon it netizen nga dapat hay ibang nasyon ro andang i-represent, nagsabat si Espiritu nga: “Tell that to all the front runners for the Philippines. This country wouldn’t have a chance on the national stage without us halfies.”
Bangud sa nasambit nga pahayag, maabung netizen ro nag-alsa it kilay ag nadismaya eabi pa ag ginaselebrar ro Independence Day it Pilipinas, adlaw it Biyernes ag naghambae nga medyu gina-ismol kara ro ikasarang it mga Pilipinong fully blooded nga magdaog sa international pageant.
Kaibahan sa mga nagtau it reaksiyon sanday Miss Universe Philippines 2024 first runner-up Stacey Gabriel ag kilaeang Filipino fashion designer nga si Michael Cinco.
Bangud kara, nagpaguwa it phayag si Espiritu agud nga magpangayo it pasaylo ag klaruhon ro anang naging komento online.
Ginpamilit nga bukon nana it tuyo nga ismolon ro mga kadaeag-an it mga Pilipinong naga-represent sa nasyon sa nagkaeain-eain nga contest. Nagpangayo man imaw it pasaylo sa publiko ag nag-apela nga indi pagdaeahigon ro anang mga negosyo, empleyado, ag iba pang organisasyong may kaangtanan kana bangud nga owa sigon sanda it kahilabtanan sa kontrobersiya.
Sa pagtapos it anang pahayag, nagpasaeamat si Espiritu sa mga nagpuna kana ag ginhambae nga magaserbi raya nga importanteng leksyon agud nga mas maeubtan nana ro epekto it anang mga ginbuhian nga tinaga.
