Kinahangean bantayan ag indi magpakampante sa bag-ong liderato bangud nga uwa pa natapos ro tanan sa pagpatalsik kay Sen. Alan Peter Cayetano bilang Senate President.
Raya ro naging pahayag ni Prof. Danilo Arao it University of the Philippines College of Mass Media and Communication.
Suno kana, sa pihak nga nabuoe it bag-ong liderato ro pwesto, indi dapat sanda magpakampante bangud nga may pilang senador sa andang bahin ro may kaso ag indi man insigida nga ma-abswelto bangud eang sa pag-intra nanda sa mayorya.
Malabong man sigon nga maging mahipos or magbalik sa normal ro operasyon it Senado bangud nga una sa gihapon ro lamat it nagtaliwan nga issue ag uwa pa it maayos nga pa-ilistorya sa magtimbang nga bahin.
Samtang, ginpahayag man nana nga dapat mahugot sa gihapon nga bantayan it mga pumueuyo ro paaeabuton nga impeachment trial bangud nga ro ginaeauman nga magiging preciding officer hay bukon it manami ro naging track record ku nataliwan nga pagdumaea.
Mageuwas pa kara, dapat nga masigurado nga magiging tayuyon ro daloy it impeachment case ag indi raya mabuhayan ukon maimpluwensyahan it politika.
