KALIBO, Aklan — Ginklaru it sangka health expert nga ro African Swine Fever (ASF) hay bukon it makataeapon ag bukon it peligroso sa ikamayad nga eawas it tawo, apang raya hay sangka eubus nga makamaeatay nga sakit para sa mga baboy.
Suno kay Dr. Philip Ian Padilla, Professor it Microbiology sa University of the Philippines Visayas nga owa it peligro sa mga tawo ro pagkaon it karne it baboy nga nag-agi sa tamang inspeksiyon ag tama nga pag-eaha.
Sa pihak kara, kinahangean suno kana ro hugut sa gihapon nga pagpatuman it mga tikang agud nga mapugngan ro pagkalhit it ASF bangud nga mabahoe ro epekto kara sa industriya it piggery ag pangabuhian it mga naga-alaga it baboy.
Padayun man nga gina engganyo ro mga hog raiser nga insigida nga i-report sa mga beterinaryo ukon lokal nga awtoridad ro anumang kaso it gulping pagkamatay ukon pagmasakit it mga alagang baboy agud nga insigida raya nga maaksiyunan ag malikawan ro pagkalhit it sakit.
