KALIBO, Aklan — Naga-abot eon sa 90 porsyento ro na-utilize nga pondo para sa nagapadayun nga konstruksyon it bag-ong Kalibo Public Market.
Raya ro ginpahayag ni Sangguniang Bayan member Ronald Marte base man sa report it accounting office it lokal nga gobyerno it Kalibo.
Sa pihak kara, owa sigon imaw it ideya angot sa status it nasambit nga pondo .
Raya hay sa tunga it espekulasyon nga basi naubos eon ro pondo tuga it long overdue nga delay it proyekto , kun sa siin, makapilang beses nga ginpa-isoe ro date of completion.
Dugang pa ni SB Marte nga mabuhay eon nanda nga gin-abiso sa Municipal Engineering Office it LGU-Kalibo nga hugut nga i-monitor ro daeagan it proyekto agud nga makatau it tul-id nga impormasyon angot sa presenteng estado ag progreso kara.
Samtang, sa ikatlong inspeksyon nga andang ginpatigayon, natukiban nga owa gihapon ginpatigayon ro mga kinahangeanon nga rebisyon sa disenyo it mga stalls partikular ro mga lamesa it meat section.
May mga pagkabaeaka man sigon nga posibleng sudlon it uean ro sueod it tindahan bangud sa nakita nga diperensiya sa ikatlong panaegan it building nga kinahangean nga maayos .
Sa pihak nga parte, nagpatigayon man sigon it separado nga inspection ro Technical Education and Skills Development Authority (TESDA) ag Department of Public Works and Highways (DPWH) sa pag-usisa sa structural integrity it edipisyo.
Base sa resulta it pag-usisa, maskin sigon nga maayos ro kalidad it welding sa guwa nga parte it building, indi sigon nanda masiguro ro kondisyon it mga welding sa sueod it istruktura bangud nga napinturahan eon ro mga raya.
Ginpahayag dugang it opisyal nga uman nga pagatalakayon it Sangguniang Bayan ro status it proyekto kaibahan ro mga natungdan nga taeatapan it local nga gobyerno.
